පසුගිය දිනවල සිදුවුන යම් සිදුවීම් කීපයක් නිසා ජනප්‍රියතම සමාජ ජාල වෙබ් අඩවියක් වන facebook මෙරට තුළ තහනම් කිරීමට (වසා දැමීමට) යාම පිළිබඳව හා හෝවක් යමින් පවතී.. සැබැවින්ම එවැන්නක් සිදුවිය හැකිද, ඒ කෙසේද හා එහි ඇති වැදගත්කම කවරේද යන්න පිළිබඳව ඔබ හා බෙදා ගැන්මට මා හටද යමක් ඇත..

මීට වසර කීපයකට පෙර තිබුණු තාක්ශණය භාවිතය සලකා බලන කල්හි වෙබ් පිටු එකතුවක් හෙවත් වෙබ් සයිට් එකක් මිස වෙබ් සර්විසස් ලෙස ගැනිය හැහි දෑ එතරම් ජනප්‍රියව නොපැවතිණ.. මෙම වෙබ් පිටු ඉතා සුළුවෙන් වෙනස් වන පෙර සැකසූ ස්තිථික සංයුතියක් ඇති ඒවා වීම නිසා ඒවා වසා දැමීම පහසු වූවා සේම ඒවායේ සමාජ, ආර්ථික බලපෑම සාපෙක්ශව අවම විය.. එලෙසින් සෙක්සි එල් කේ.. ටියුබ් 8 , ගොසිප් ඊ ලංකා වැනි අඩවි මෙරටට වසා දැමුණු අතර ඒවායෙන් වැඩිමනක් යහපතක් මිස බලපෑමක් නොවිය. එවැනි එයින් සමහරක් තහනම් කිරීමට පියවර ගත් අයට ඒ සඳහා මල් තියා වැන්දත් කමක් නැත.

නමුත් ෆේස්බුක් යනු එවැන්නක් නොවේය.. එක් මාධ්‍යකින් පමණක් නොව විවිධ අයුරින් සම්බන්ධ විය හැකි තාක්ශණිකව බෙහෙවින් පැතිරුණු වෙබ් සේවා (Web Service) මෘදුකාංගයකි.. ඊටත් වැඩි ප්‍රමාණයකින් සමාජය තුළටද මෙම සේවාව පැතිරී ගැටගැසී අවසන්ය.. ෆේස්බුක් සෘජුව හා වක්‍රව භාවිතයට ගැනෙන අනෙකුත් තාක්ශණික මෙවලම්/ වෙබ් සේවා (අතිශය ප්‍රයෝජනවත්) කොතෙකුත් ඇත.. ඒ අතර ගූගල්+, ස්කයිප්, ට්විටර්, ලින්ක්ඩ් ඉන් ආදිය වේ.. මේ මෙවලම් තුළින් පවා තම ෆේස්බුක් ගිණුමට යම් යම් සම්බන්ධවීම් කිරීමට ඉඩකඩ ඇත.. දැන් පැමිණෙන දුරකතන වල උපතින්ම ෆේස්බුක් පැමිණෙන්නේද ඉහත කී ෆේස්බුක් හි සමාජ කිඳාබැස්ම නිසාවෙනි..

ෆේස්බුක් එසේ ලේසියෙන් තහනම් කළ හැක්කක් නොවන්නේ වැඩිමනක්ම එය පුද්ගල ජීවිත හා සමාජය සමඟ මේ ඇතිකරගෙන තිබෙන බැඳීම නිසාවෙනි. ඒ හැරුණුකොට එහි තාක්ශණික පැතිරීමද සුළුපටු නොවෙන නිස මෙලෝ සිහියක් නැතුව ෆේස්බුක් වල සියළු සේවා මාර්ග අපේ රට තුළට අවහිර කිරීම යනු ඒ හා බැඳුණු අනෙකුත් සේවාවන්ටද ඇතැම් බලපෑම් සිදුවන කාරණයකි.. ඒ පිළිබඳව මීට වඩා යමක් කීමට networks, internet security , information system security, systems ආදී කොටස් විශේෂයෙන් ඉගෙන ගත් අයෙකුට මට වඩා හැකියාවක් පවතී.. මා මේ අදහස් පලකරන්නේ දත්ත හා ඒවායේ සබඳතා සලකා බැලීමෙනි..

කෙසේ වෙතත් එවැනි අමර කට්ටක් කා ෆේස්බුක් අවහිර කිරීමද ගඟට ඉණි කැපීමකි.. පය බරවායට පිටිකර බෙහෙත් බැඳීමකි.. මෙහිදී මා පය බරවාය ලෙස කෝණ දෙකක් දක්වමි.. එකක්නම් මේ මතුපිටින් පෙනෙන දරුවන් විපතට පත් වීමය.. ඊටත් වඩා ඇතැම් අයට හානිකර වන්නේ මේ හරහා බිහිවන විකල්ප මාධ්‍යයන්ය.. විරුද්ධ අදහස් සමාජගත වීමය.. තමන්ට පෙන්වන්නට උවමනා දේට වඩා සත්‍ය හෝ විකෘති කරන ලද සත්‍ය සමාජයට ගැලීමය. ඔවුන්ට උවමනා ප්‍රමාණයට වඩා ගැඹුරින් ජනතාව සාකච්ඡා කිරීමය.. නමුත් ෆේස්බුක් අවහිර කිරීමෙන් මේවා වෙනස් වෙන්නේ නැත.. අද ගූගල් + ෆේස්බුක් මට්ටමටම ඇවිත් ඇත.. ස්කයිප් වෙනම පාරක ඊට වඩා ප්‍රබල මාධ්‍යයක් වී ඇත.. වයිබර්, ලින්ක්ඩ් ඉන්, ට්විටර් ආදී නොයෙකුත් ආදේශක පවතිද්දී ෆේස්බුක් පමණක් තහනම් කිරීමට යන්නේ ඇයිදැයි නොවැටහේ..

ඇතැම් විට මේ විකල්ප පිළිබඳව නොදැනුවත්ද? මේ සියල්ල තහනම් කරන්නේනම් ඉන් පසු දුරකතනද වසා දමන්නට වෙන්නේ නොවේද.. පසුගිය කාලයේ මිස්කෝල් ඔස්සේ දිවි නසාගත් අයද මීට වැඩියෙන් වාර්ථා විය.. දුරකථන ඇමතුම් ඔස්සේ සියල්ල නැතිකරගන්නා කෙල්ලන් අතරට මෙය කියන වෙලාවේ පවා කීදෙනෙක් එකතුවෙනවාද යන්න කිව නොහැකිය.. එක දුරකථන ඇමතුමෙන් දෙකෙන් හෝටල් කාමරයක තනිවෙන්න අද කෙල්ලන් පසුබට නොවේ..
ශ්‍රී ලංකාවේ ප්‍රධාන දුරකතන සේවා සමාගමක සේවය කරන නන්නාදුනන තරුණියෙකු හා දුරකතන සංවාදයකට මුලපුරා එදිනම “මාව බලන්න එනවද ?” යන්න කියවා ගන්නා පුද්ගලයෙක් මා පුද්ගලිකවම දැක ඇත්තෙමි.. එසේ බලන්න එනවා යන්නෙහි අරුත මෙය කියවන ඔබට තේරෙනවා ඇතැයි සිතමි.. ඉන්පසු සිදුවූ දේද ඔබ අවබෝධ කරගනු ඇතැයි විස්වාස කරමි.

ඉහත මා කී පය බරවායවල් දෙකටම ෆේස්බුක් තහනම් කිරීමෙන් පිළියමක් ලැබෙන්නේ නැත.. ඉන්පසු සිදුවන්නේ ගූගල්ද වසා දැමීමටය.. බොහෝ වෙබ් පිටුවල ඇතැම් කොටස් ගූගල් භාවිතා කරයි.. බොහෝ නූතන වෙබ් අඩවි වල භාවිතා වන ජේකුවරි ආදිය කෙලින්ම ගූගල් සර්වරයේ සිට ක්‍රියාත්මක වන ලෙස සකසා ඇත.. මෙසේ කිරීමට බොහෝ තාක්ශණික වාසි හේතු වේ.. රාජකාරී සඳගා ගූගල් භාවිතා වේ.. සිතියම්, දිනපොත් ආදී නොයෙකුත් වෙබ් සේවා ගණනාවක් පිරිනමන ගූගල් මත අප රටේ බොහෝ ආයතන යැපෙන නිසා ගූගල්ද වසා දැමුණොත් එය රටේ අර්ථ ක්‍රියාවලියට පවා බලපාන බරපතල කරුණක් වනු ඇත ෆේස්බුක්ද එසේමය.

එබැවින් ෆේස්බුක් වසා දැමීම පහසු නොවන, ගැටළු මතුකරන හා මෙලෝ තේරුමක් නොමැති දෙයක් වන නිසා බුද්ධිමත් රජයක් එය වසා දමන්නට පියවර නොගනු ඇති බව මම සිතමි..

ළමුන් පිළිබඳ කාරණාවේ වගකීම දෙමාපියන් ගත යුතුය.. ෆේස්බුක් යාමට නොදී සිටීම නොව එහි හමුවන විශේෂ මිතුරන්ගේ අවශ්‍යතාවය දරුවන්ට නැතිකිරීම, දරුවා තුළ ගොඩනඟන විස්වාසය, ආදරය සහ දරුවා පිළිබඳව විමසීමෙන් ඉවසීමෙන් සිටීම ප්‍රමානවත් වන්නේ නොවේද ?

අනෙක් කාරණාවටනම් ඉතින් කරන්න දෙයක් නැත.. තමන් හොඳ කරානම් මිනිස්සු කතාකරන දේ ගැන බයවෙන්න දෙයක් නැත්තේය..

ප.ලි මෙය ලියා අවසන් වනවාත් සමඟම මා ඉහත කී වර්ගයේ කෙනෙක් මේ කාරණාව ගැන විග්‍රහ කර තිබුණා මේ සබැඳිය ඒ වෙතයි

ප්‍රොක්සි සර්වර්ස් සම්බන්දව මා කිසිවක් ප්‍රකාශ නොකලෙමි.. ඒ ඒවා පිළිබඳ මාගේ එතරම් ප්‍රසාදයක් නොමැති නිසාය.. නැතිනම් හයිඩ්මයි ඈස් හෝ ඊබඩී වැනි දෑද විකල්ප ලෙස භාවිතා කළ හැකි නිසා ෆේස්බුක් තහනම පලක් ඇත්තේම නැත 😀

Advertisements