Archive for August, 2011

ගෙයක් හදනවාද… එහෙනම් මේ ටික ගොඩක් වැදගත්වෙයි.. !!! 2 – පළමු පියවර

කලින් කිව්වා වගේ හොඳට සූදානම් උනාම වැඩ අරඹන්නයි තියෙන්නේ..
අත්තිවාරම ඔබේ නිවසේ වගකීම් සහතිකයයි.. සැලසුමේ කොටසක් හෝ සම්පූර්ණයෙන්ම හෝ ඉදිකරනවානම් අදාළ කොටසේ මතුපිට පොළොව එක මට්ටමකට ගැනීම වැදගත්. පේව්මන්ට් දැමීමේදී නැවත මට්ටම් කරනවාට වඩා යන්ත්‍රයක් යොදා කරගැනීම ලාබදායකයි.

අත්තිවාරම කැපීමට සුබ නැකතක් බැලීම වැදගත්ය. නැකැත් අනුව නියමිත ස්ථානයේ පිරිසිඳු සිතින්, මේ නිවසේ වෙසෙමින් මට මුළු ලෝකයටම යහපතක් කරන්න ලැබේවා කියන ප්‍රාර්ථනයෙන් මුල්ගල තබන්න. නිදන්ගල තැන්පත් කර ගෙපළ හෙවත් අත්තිවාරමට අවශ්‍ය කාණු කැපීමට සේවකයින් යොදවන්න. කාණු කපනවිට මුළුපරස් පිළිබඳ ඔබද අධීක්ශණය කරන්න. මෙය බොහෝදෙනෙක් දන්නා කරුණක් වුවද මෙහි විස්තර කරමි.සැළසුමේ විශේෂයෙන් සඳහන් කර නොමැතිනම් බිත්ති දෙකකින් සැදෙන සෑම මුල්ලකම කෝණය අංශක 90ක් විය යුතුය. එසේ නොමැති වුවහොත් කපරාරුකිරීමේදී,ටයිල් කිරීමේදී හා සිවිලිම ගැසීමේදි විවිධ ගැටළු ඇතිවේ. රූපයේ දැක්වෙන ආකාරයට නිවැරදිව මුලුපරස් සකසාගත යුතුමය.

මෙයම බිත්ති බැඳීමේදීද මීටත් වඩා හොඳින් බැලිය යුතුය.
පයිතගරස් ප්‍රමේයය භාවිතා කිරීමෙන් පහසුවෙන් මෙය බැලිය හැක. බිත්ති දෙක බැඳීමට පෙර නූල් අදින අවස්තාවේ නූල් දෙක හමුවන ස්ථානයේ සිට එක් නූලක් දිගේ මිනුම් ඒකක 3ක් ද, අනික් නූල දිගේ ඒකක 4ක්ද ලකුණු කරන්න. මේ සලකුණු දෙක අතර දුර ඒකක 5ක් වන පරිදි නූල් දෙක වෙනස් කළ යුතුය.

මිනුම් ඒකකය හැකිතාක් විශාලව ගන්නා තරමට නිරවද්‍යතාව වැඩිය. 3,4,5 වෙනුවට 6,8,10 ලෙස ගැනීමට හැකිය. මීටර් වලින් හෝ යාර, අඩි.. මේ ඕනෑම මිනුම් ඒකකයක් වලංගු වේ.
මෙසේ කරනවිට අනිවාර්යයෙන් එකිනෙකට මුහුණලා තිබෙන බිත්ති සමාන දිගින් යුත් වන පරිදි සැකසේ… නිවසේ සැකිල්ල බැන්ද පසු නිවසට වහලයක් අවැසිය…. මතුසම්බන්ධයි

Advertisements

ගෙයක් හදනවාද… එහෙනම් මේ ටික ගොඩක් වැදගත්වෙයි.. !!! 1 – සැරසෙන්

ඉතින් කොහොමද… ඔන්න පොරොන්දු උනා වගේම මම ගේ හදන්න ගිහින් ඉගෙනගත්ත දේවල් ඔයාලා එක්ක බෙදාගන්නවා.. මේවා දැනගෙන ඉන්න එකනම් අනිවාර්යයි..

ගෙයක් අළුතින්ම හදනවානම් හොඳ සැලැස්මකට අනුව මුළ ඉඳන් අතේ තිබෙන මුදලට සරිලන විදිහට කරගෙන යන්න.. කවදාවත් අතේ තියෙන සල්ලි සීමාවේ හැමදේම කරගන්න හිතන්න එපා… වැදගත්වෙන්නේ නිවසේ කල්පැවැත්ම, නිමාව, සහ අවසන් වටිනාකමයි.

තමාගේ වත්කමේ හැටියට දළවශයෙන් සුදුසු නිවසක් සැලසුම් කරගන්න එක තමා වඩා හොඳ..
මොනතරම් සල්ලි තිබුණත් සාමාන්‍ය අපිදෙන්නයි දරුදෙන්නයි ඉන්න සත්තරන් පවුලකට තනි තට්ටුවේ නිවසක් හොඳටම සෑහෙනවා කියන එක තමා මගේ මතය. කාමර තුනක් හෝ හතරක්, ඉඩකඩ ඇති සාලයක්, කෑම කාමරයක්, කුස්සියක්, නාන කාමරයක්, ගරාජයක්, වැරෙන්ඩාවක් සහ කැමතිනම් බාහිරව තවත් වැසිකිලියක් නානතොටක්, රෙදි සෝදන ස්ථානයක් වගේ අමතර දේවල් නිවසේ සුන්දරත්වය විනාස නොවන විදිහට සුදුසු තැනක හදාගන්නත් බාදාවක් නෑ.

මේ හැමදේම සකස්කරලා නිවසක් හදාගන්න සහ හවසට විවේකීව ඉන්න ගෙවතු පොඩ්ඩකුත් තිබ්බනම් තව වෙන මොනවද ඩලා…

මේ ටික සේරම කරන්න හොඳ ඉඩම් කෑල්ලක් උවමනායි.. මේ දවස්වල නම් මම ජීවත්වන ප්‍රදේශයෙන් ඉඩමක් ගන්න එක ජීවිතේ ලොකුම ලොකු වටිනා ආයෝජනයක් කියලා මට හිතෙනවා.. මේ ප්‍රදේශයේ ඉදිරි වසර කීපයේ නියමිතව තියෙන සංවර්ධන සැලසුම් සලකනකොට ලංකාවේ මිලෙන් අධිකම ඉඩම් තිබෙන පළාතක් වෙන්න ගොඩාක් ඉඩ තියෙනවා. ඒත් මේ දවස්වල ඒ තරම් ගණන් නෑ..

ඉඩම ගද්දී විශේෂයෙන් පර්චස් 15ට වැඩියෙන් ගන්න පුළුවන්නම් හොඳයි. හොඳ අනුමත වෙච්ච සැලසුමකට මම උඩ කියපු ගෙදර හදාගන්න කරදරයක් නැතිවම පුළුවන් එහෙම උනොත්. ඉඩම් වලට ඔප්පු ක්‍රමය නැතුව පරිගණක ගත ක්‍රමයක් දැනටම ආරම්භ වෙලයි තියෙන්නේ… මේ ආකාරයේ ඉඩමක් නම් පත්තිරු පරික්ෂාකරන එක අනවශ්‍යයි ඒවා හොඳටම නිරවුල් වෙලා තියෙන නිසා.

ඉඩමේ පිහිටීම තමා ඊගාවට.. පාරෙන් මඳවශයෙන් ඉස්සිලා තියෙන ඉඩමක් වඩාත් සුදුසුයි.. හේතුව වැසිජලය බැස්සවීමට පහසුව්මයි. හැබැයි පාරෙන් ජූන්ජක් පහත ඉඩමක් හරි ලාබෙට හම්බෙනවනම් ගන්න. පස් ටිකක් පුරවලා ගොඩදාගන්න පුළුවන්නේ.. පොඩ්ඩක් සිරස පාච්චිකරලා බලන්න මොකක්ද ලාබම කියලා.

ඉඩම බලද්දී තව දේවල් ගොඩාක් බලන්න තියෙනවා. ඉඩමට ලොකු ටිපර් එකක්, බැකෝ එකක් පහසුවෙන් ගේන්න පුළුවන්ද කියලා බලන්න.මොකද ගල් වැලි සිමෙන්ති ආදී දේවල් ගේන්න මිනිස් ශ්‍රමයත් යොදන්න උනොත් (Manual), ඒක වියදම් අධිකම ඉදිකිරීම් අයිතමයක්. ඒ එක්කම මේ ඉදිකිරීම් බහුතරයක් ද්‍රව්‍ය උසස් තත්වයෙන්,පහසු මිළට ලබාගන්න තැනක් අහළපහළ තියෙනවද කියලාත් බලන්න. ගමනාගමන පහසුකම්, පාසැල්, පොදු පහසුකම්, තෙකලා විදුලිය, නළ ජලය ආදියනම් හැමෝම හොයනවානේ.
අද ලෝකේ දියුණුයි මේවා හැරුණුකොට තවත් පහසුකම් රැසක් ගැන සෙව්වාට වරදක් නැත. දුරකතන පහසුකම් ලබාගත හැකිද, දුරකතන මාර්ග ඔස්සේ අන්තර්ජාල පහසුකම ලබාගත හැකිද(ADSL), ජංගම දුරකතන සංඥා තත්වයන් (එයිනුත් 3G හෝ 4G නම් වඩා හොඳයි), රූපවාහිනී ගුවන්විදුලි සංඥා තත්වයන් (අවම වශයෙන් ප්‍රධාන නාලිකා කීපයවත්) ආදී දැ මේ හොයනවානම් හොඳයි ගොඩට වැටෙනවා.

ඉඩම වටේ දැනට ගෙවල් නැති එක තරමක වාසියක්.. අපේ ඉඩමේ ළිඳ, වැසිකිළි වල, කුණුවල, අපජලය වල කියන මේවා ස්තාපනය කරද්දී රජයේ නීති රෙගුලාසි සැලකිල්ලට ගන්න උවමනා නිසා අහල පහල ලිං, වලවල් ගැන වදවෙන්නේ නැතිව අපේ උවමනාව ඉස්ට කරගන්න පුළුවන්. ඒත් අපි කවුරුත් මනුස්සයෝ නිසා අසල්වැසි ඉඩම් හිමියෝ හිර වෙන්නේ නැතිවෙන්න පුළුවන් තරම් සැලකිලිමත්වෙලා මේ වැඩේ කරන්න ඕන.

ලිඳත් අනික් වලවල් අතරත් නියමිත දුර තැබීම අතිශය වැදගත්. සැලසුම් හදලා දෙන මහත්තයෙක්ට කිව්වම මේ හැම එකම හිතලා හොඳ සැලසුමක් ඇඳලා දෙයි. වාස්තු විද්‍යානුකූලව වැඩේ කරගන්න උත්සාහ කරන එක කොයිකටත් හොඳයි.වැසිකිළි වළට මීටර 10-15 අසලවත් ලොකු ලොරියක් පැමිණීමට තරම් ඉඩ තබාගැනීම වටී. වළ උතුරා යන අවස්තාවක ගලි රථයක සේවය ගෙන ගැටළුව විසඳාගත හැකිය. ප්‍රාදේශීය සභා සහ පුද්ගලික ආයතන ගණනාවක් මෙම සේවය ලබාදෙයි. මේ සියළු වළවල් වලට කොන්ක්‍රීට් සිලිංඩර බැස්වීම වඩා හොඳ විසඳුමක්ය. ගලිරථ සේවය ලබාදෙන්නේද මෙසේ නිමවූ වළවල් සදහාය

ඔන්න සැළසුමත් හරි. ඔය සැළසුම අනුමත කරගන්න එකත් වැදගත්.

මේ ටික කරලා අතේ ඉතුරුවෙන මුදලින් මේ සැළසුමේ කොයිතරම් දුරකට වැඩ කරගන්න පුළුවන්ද කියලා දළ ඇස්තමේන්තුවක් හදාගන්න. හැම තිස්සේම 5-10 % අමතර වියදම් යටතේ වෙනම තියාගන්න.. එතකොට හිරනොවී වැඩටික කරගෙන යන්න පුළුවන්.

අතේ තියෙන මුදලින් බඳින්න පුළුවන් එක ගලද.. ඒ ගල සැලසුමේ හැටියට බඳින්න. ඒක ඉතුරුවක්. ආයේ කඩලා බිඳලා හදන්න ගියාමත් ඒ විනාසවෙන්නේ ඔයාලා දහදුක් විඳලා හම්බකරපු සොච්චම බව මතක තියාගන්න.. එක බ්ලොක් ගලක් කපරාරුව එක්ක කඩලා දාන්න උනොත් එතන වෙන පාඩුව කොතරම්ද දන්නවද. එක න්ලොක් ගලක් රුපියක් 30ක් පමණ වෙනවා. එක ගලක් බැඳීමට රුපියල් 10ක්වත් වැයවෙනවා.වර්ග අඩියකට ආසන්න ගලේ දෙපස කපරාරුවට ශ්‍රමය රුපියල් 40-44 ක් වෙනවා. සුද තැබූ එකක් නම් මේ අගය රුපියල් 50ක් පමණ වෙනවා. අමුද්‍රව්‍ය වියදමත් රුපියල් 40ක් පමණ වෙනවා. කැඩීමේ ගාස්තු වර්ග අඩියට 20ක් පම්ණ වෙනවා. මුළු වියදම රුපියල් 170 ඉක්මවනවා. ඒ කියන්නේ එක බ්ලොක් ගලක් දෙපස කපරාරු සමඟ කඩා ඉවත්කරන පාඩුව රුපියල් 170ක්. වේලක් හොඳට කාලා තේ එකකුත් බොන්න තිබුණ සල්ලි නේද. ඒ එක ගලක පාඩුව පමණි.
මේ හැම ඉදිකිරීමක්ම ඔබට කරගන්න අපහසුයි. ඒකට මිනිස් ශ්‍රමය මිලදීගන්න වෙනවා. (තේරෙන සිංහලෙන් කියනවානම් බාස්ලා සහ ගෝලයෝ වැඩට යොදවාගත යුතුයි) නිවසක් ඉදිකරද්දී නානාවිද බාසුන්නැහේලාගේ සේවය උවමනා වෙනවා. මේසන් බාස්ලා, වඩු බාස්ලා, ඉලෙක්ට්‍රිකල් බාස්ලා,පයිප්ප බාස්ලා,ටයිල් බාස්ලා,පොටි බාස්ලා වගේ ගොඩාක් අය මේ වැඩේදී උවමනා වෙනවා. අදකාලේ මේ කවුරු උනත් බොහෝවිට කරන්නේ වංචාව. නොකරන අයත් ඉන්නවා. ඒත් එහෙම අය හොයන එක බොහොම අමාරුයි. හෙව්වත් ඒ අයට වැඩ අධික නිසා දිනයක් වෙන් කරවගන්න අපහසු වෙන්න පුළුවන්. ඒනිසා බොහෝම ඉවසීමෙන් හරි කෙනා තෝරගන්න ඕන. (කසාද බඳින්න තෝරන කෙනා තේරුවා වගේම පරිස්සමින්). වැඩේ බාරදෙන්න කලින් ඒ කෙනා කලින් කරපු වැඩ කීපයක්ම බලන එක හොඳයි. මගේ අත්දැකීමෙන් දන්න දේ තමා ගොඩාක් දවස් පඩියට වැඩ කරන අය දවසක වැඩ දවස් තුනක් විතර ඇදීම. මේකෙන් ඔබේ ඉදිකිරීමේ ශ්‍රම වියදම 300%ක වැඩි අගයක් ගන්න ඉඩ තියෙනවා. මුදල්මය වශයෙන් මෙන්ම සමාජීය වශයෙන්ද ඔබ රැවටීමට ලක්වීම ඔබේ ප්‍රතිරූපයට හානිකරයි. මේ නිසා තමා හොර බාස්ලාට අරින සාස්තරේ ඉගෙන ගන්න උවමනා වෙන්නේ. ඔබ ඉදිකරන කොටස පිළිබඳ හොඳ අවබෝදයක් ප්‍රථමයෙන් ලබාගන්න. මේ දේවල් ගැන හොඳින් දැනුවත් කෙනෙක්ගෙන් හොඳින් අසා මේ හැම දේ ගැනම හොඳ අවබෝධයක් ලබා තිබීම ලොකු වාසියක්. ඔබේ ඉදිකිරීමේ තිබෙන විශේෂතා හඳුනාගන්න. හැම අංගයක් ගැනම සැලකිළිමත්වෙන්න. සිවිලම උළුවහු ආදී කොටස් ස්ථාපනය කරන ආකාරය ගැන කල්තියා සිතන්න.
වැඩ පටන්ගන්න පෙර හොර බාස්ලාට අරින සාස්තරේ එක පදයක් කියාදෙන්නම්..
සාමාන්‍යයෙන් මුළු වැඩේටම අදාළව මිළක් නියම කර‍ගැනීම සහ ගතවන දින ගණනට අදාළව මිළ තීන්දු කරගන්න පුළුවන්. ඔබට අධීක්ශණය වඩාත් අපහසුනම් කොන්ත්‍රාත් ක්‍රමය හොඳ වුවත් මෙහිදී දරන්න සිදුවෙන වියදම දෙගුණයකට ආසන්න වේ. හැම විටම වැඩබිමේ සිටිය හැකිනම් දවස් පඩි ක්‍රමයට යාම ලාබදායකය. ඒත් ප්‍රවේසමින්. මෙය අවදානමක් සහිතය ඒ අවදානම මම ඉහතදී විස්තර කළා නේද?. බයවෙන්න එපා. මම ඉන්නවනේ. මම කියාදෙන්නම් හිරකරන විදිහ. බාස්ලා ආණ්ඩු වගේමය. පොරොන්දු දහසක් දී වැඩේ ලබාගනී.. ආ දවසේ සිට කියන්නේ අනික් බාස්ලාගේ වැරදිමය තමාගේ ගුණය. අවසානයේ උන්ට හපන් මුන් ය. මේ බොරදියේ මාළුබාගන්න ඔබ දක්ශ විය යුතුය. ඔබ කරන්න යන වැඩකොටස හොඳින් විස්තර වන ගිවිසුමක් සකසාගන්න. එයට ගතවන දින ගණන දළ වශයෙන් අවබෝධයට ගන්න. ඔබේ නිවසේ වැඩට මුලින්ම එන්නේ පෙදරේරුවාය. සාමාන්‍යයෙන් එක් අත් උදව්කරුවෙක් හෝ දෙදෙනෙක් ඔහුට අවශ්‍යවිය හැක. මුලින් දෙන පොරොන්දු රොත්තේ අනිවාර්ය අංගයක් වන්නේ “මම මේක මාසෙන් කරලා දෙන්නම් මහත්තයා.” නමුත් සමහර ඉදිකිරීම් අංග එලෙස අපිට හදිස්සියට කළ නොහැකිය. කොන්ක්‍රීට් ඉදිකිරීම් එළෙස කල්මැරීම උවමනා වන අංග වේ. බුද්ධිය මෙහෙයවා සුදුසු කාල සීමාව තීරණය කරගෙන 10%ක පමණ අමතර කාලයක් තබා එම කාලය ගිවිසුමේ ඇතුළත් කරගන්න.ගිවිසුම නීතිමය වශයෙන් ශක්තිමත්වීම අවශ්‍යම නැත. මෙහිදී අපගේ අරමුණ බාසාට මානසික විලංගුවක් දැමීම පමණි.
මේ ගිවිසුමට එකඟවීමට අදිමදි කරන්නේනම් රුපියල් 100ක් පමණ දින පඩිය වැඩියෙන් කියන්න. බටර් ගෑම, හුණුගෑම, මුරුන්ගා අත්තේ තැබීම වැනි දේවල්ද හොඳ ප්‍රතිපල ගෙන දේ.ගිවිසුමේ කාලය යන්තම් එහාමෙහාවුනු පමණින් බාසාගේ බෙල්ල මිරිකීම වැරදිය. වැඩ අවසානයේ ඇඳුමක් දෙකක් තෑගිදීම, රුපියල් 1000ක් පමණ වැඩිපුර දීම මිනිසත්කමේ නාමයෙන් ඔබටද යහපතක් ගෙන දෙන පුණ්‍යකර්මයක් වනු ඇත.ඒ කොතරම් හොර කළත් ඔවුන්ද දරුපවුල් ජීවත්කරවන මිනිසුන් වන නිසාය.